هووووووووووووووووووب  <<<< سم الله  

عنوان غريب !!

صحيح العنوان غريب بس  الموقف الي صار جان اغرب من هالعنوان

امي :ماماتي  كريسو نظفي البنكه

كوني بنت مطيعه تحلم بها كل ام عربيه تهمها مصلحة الامه و الشعب العربي العظيم !!

انطلقت انفذ الي انطلب مني

طبعا البنكه  ام تلث ريش  هي المروحــه   وحالها من حال أي شي بالبيت لازم يتنظف

وكون  البنكه شي يتلق بالسقف يعني عاليه وحتى انظفها لازم اصعد على  درج  (سلم)

الدرج !!

اهوووو  الدرج انكسر قبل اسبوع لما اجا للبيت عموم سمين وصعد عليه

وطرااااااااااااااااخ العمو و الدرح انبطحوا بالقاع

الموقف  جان يضحك  بس اني مضحكت !!

ما ضحكت مو علمود مشاعر العمو

بس ما ضحكت لان ما شفت المشهد قدامي !!

الدرج مكسور  .... والحل ؟ !

اكو بالبيت فد طبلة اثريه  (ما ادري شنو اسم الطبله بالفصحى) عموما الطبله شي  مثل الطاولة بس اصغر

هالطبله عاليه وقويه  يعني  تتحمل ثقل  اني مو ثقيله  بس الحذر واجب !!

هزيت طولي وصعدت ع الطبله وبديت انظف البنكه 

خلصت الحمد لله  وقررت انزل

واني انزل ....

هووووووووووب

طوووووووووووووووووب

طرااااااخ

الاولى صوت وقعتي من الطبله للقاع

الثاني صوت ارتطام جسمي بالارض

والاخيره صوت الطبله العاليه الثقيله علي

طبعا مشهد عجيب 

صحيح اني ما شفت المشهد لان اني الي جنت بيه

بس شي خرافي

باجزاء من الثانيه تنقلب كل الموازين

سبحان الي  الطبله الي اني جنت عليها صارت عليه !!

صدق دنيا دواره

سرعة الحادث و وعنف المشهد وقوة الام الي حسيت بيه

خلتني ابجي ...

شكو بيها ما شايفين واحد يبجي !!

بعدين البجي مو عيب <<< كافي لا تتعاركين محد قال شي

وبغضون ثواني  بعد ما استوعبت  شنو الي صار بيه

قمت اضحك

صار لي فتره ما واقعه  وقعه محترمه

بجي على ضحك  شي دخل بشي

لوهله  خفت لايكون تاثر دماغي بهالحادث

الحمد لله عدت سلامات

صحيح لحد الان احتفظ ببعض الكدمات على ايدي ورجلي

بس كل اجزاء جسمي  موجوده اليوم

والحمد لله